Керү
Парольне алмаштырырга
Парольне алмаштырырга

Парольне онытсагыз, E-Mail адресыгызны кертегез. Парольне алмаштыру өчен кирәкле мәгълүмат E-Mail адресына җибәреләчәк.

Шәхси кабинетка керү
Техник ярдәм күрсәтүгә хәбәр җибәрү
Размер:
AAA
Цвет: CCC
Изображения Вкл.Выкл.
Обычная версия сайта
17.04.2020, 09:43

Казанлылар музыка һәм сәнгать мәктәпләренә керү имтиханнарын дистанцион режимда тапшыра алачак

Кабул итү комиссияләре июньдә эшли башлаячак.


(Казан шәһәре KZN.RU, 17-нче апрель, Ксения Швецова). Казанда мәктәпләр белән параллель рәвештә өстәмә белем бирү учреждениеләрен дә дистанцион укуга күчерәләр. Шулай итеп, дистанцион технологияләр кулланып электрон укуга балалар сәнгать мәктәпләрендә белем алучы 8,5 мең укучы күчте. Киләсе елга укучылар сәнгать һәм музыка мәктәпләренә укырга дистанцион рәвештә керә алачак. Бу хакта кичә Казан Мэры Илсур Метшин мәктәп директорлары белән уздырган киңәшмәдә Башкарма комитет җитәкчесенең беренче урынбасары Рөстәм Гафаров хәбәр итте.

Дистанцион эш форматына күчү белән сәнгать мәктәпләренең төркемле дәресләре һәм күмәк башкаручанлык репетицияләре нигездә зур булмаган төркемнәр белән видеоконференцияләр үткәрү сервисы аша уздырыла, дип хәбәр итте Р.Гафаров.


«Бүгенге көндә төп өстенлек булып укучыларның инде алынган белемнәрне беркетүләре тора. Мәктәпләр дистанцион режимда арадаш һәм йомгаклау зачетларын һәм имтиханнарын уздыруны оештыруга әзерләнә. Уку процессы 15-нче майга якынрак тәмамланыр дип планлаштырыла», - диде ул.

Быел, Р.Гафаров сүзләренә караганда, чыгарылыш укучыларының 15%-ы диярлек профильле урта һәм югары уку йортларына керергә планлаштыра, шуңа күрә чыгарылыш укучыларына югары игътибар бирелә.

Киләсе уку елында edu.tatar.ru сайты аша электрон форматта балаларны музыка һәм сәнгать мәктәпләренә кабул итү планын һәм тәртибен формалаштыру буенча эш алып барыла. Укуга ихтыяҗ зур булу сәбәпле, уку елы тәмамлангач та, мәктәпкә керү өчен дистанцион формада кабул итү сынауларын башлап җибәрү планлаштырыла. Уртача алганда, музыка мәктәпләренә керү конкурсы бер урынга уртача 2 кеше, сәнгать мәктәпләренә - 4 кеше, дип искәртте Р.Гафаров. Кабул итү комиссияләре июльдә эшли башлаячак, дип өстәде ул.

Денис Гордийко фотосы

Дистанцион технологияләр кулланып укуга балалар сәнгать мәктәпләрендә укучы 8,5 мең бала күчте, дип сөйләде Башкарма комитет җитәкчесенең беренче урынбасары Рөстәм Гафаров.

Балалар һәм яшьләр эшләре комитеты учреждениеләрендә дә дистанцион эш җайга салынган. Мәсәлән, Гайдар исемендәге яшүсмерләр клубында һәм яшьләр үзәгендә соңгы ике атнада учреждение белгечләре 600-дән артык онлайн-дәрес уздырган, ә туры эфирларны 25 меңнән артык кеше караган, дип хәбәр итте Башкарма комитет җитәкчесенең беренче урынбасары. Караулар буенча иң популяр темалар булып флористика, артикуляцион гимнастика, бишектән үстерү, сәнгать мастер-класслары, йога буенча дәресләр, шаржлар ясау һәм кулинар мастер-класслар тора.

Балалар өчен төрле онлайн-юнәлешләрдә шулай ук мәдәни үзәкләр һәм мәдәният йортлары да эшли башлады.

«Килеп туган хәлгә карамастан, без кыенлыкларны яңа мөмкинлекләр буларак кулланырга тырышабыз, һәм безнең эш шул ук юнәлештә дәвам итәчәк», - дип нәтиҗә ясады Р.Гафаров.

Фоторепортаж
И.Метшин Казан мәктәпләре директорлары белән очрашты
Видеорепортаж
17.04.2020 09:24
Барлык яңалыклар