Казанда «Хезмәт батырлыгы шәһәре» стеласы Оренбург трактында урнаштырылачак

Әлеге урын иң күп тавыш җыйды.

Фото: Денис Гордийко

(Казан шәһәре KZN.RU, 25-нче сентябрь). Казанда «Хезмәт батырлыгы шәһәре» стеласы Оренбург трактында урнаштырылачак. Бу урын тавыш бирүдә иң күп тавыш җыйды, ул Казан Мэры кушуы буенча KZN.RU порталында ай дәвамында - 20-нче августтан 20-нче сентябрьгә кадәр барды.

«Хезмәт батырлыгы шәһәре» стеласын урнаштыру урынын сайлауда барлыгы 3 мең 714 кеше катнашты.

Исегезгә төшерәбез, архитекторлар фикер алышуга стеланы урнаштыру урыннарының өч вариантын: шәһәрнең көньяк «капкалары» - аэропорт ягыннан керү (Оренбург тракты), көнбатыш «капкалары» - М7 трассасыннан Залесная урамына керү һәм көнчыгыш «капкалары» - Мамадыш трактындагы транспорт чишелеше ягыннан. Моннан тыш, казанлылар стеланы урнаштыру өчен үз вариантларын да тәкъдим итә алган.

Россия Президенты Владимир Путин Указы белән Казанга һәм тагын 19 Россия шәһәренә «Хезмәт батырлыгы шәһәре» мактаулы исеме бирелде. Бу шәһәрләрнең һәрберсендә шәһәр гербы сурәте һәм мактаулы исем бирү турында РФ Президенты Указы тексты белән стела урнаштырылачак.

Казанга мактаулы исем бирү турындагы карарны шәрехләп, ТР башкаласы Мэры Илсур Метшин болай дип билгеләп үтте: «Безнең шәһәрнең меңьеллык тарихында тагын бер мөһим сәхифә барлыкка килде. Без казанлыларга һәм Бөек Ватан сугышы елларында Казан икенче йортларына әйләнгән меңләгән кешеләргә хөрмәт күрсәтәбез. Бу өлкән буынның хезмәт батырлыгына хөрмәт, тыл ветераннарының һәм Җиңү хакына эшләгән күпсанлы предприятиеләрнең казанышларын тану.

Илсур Метшин сүзләренчә, бу вакыйга өлкән буын кешеләре өчен генә түгел, яшьләр һәм балалар өчен дә мөһим. Алар өчен үз шәһәрләре белән горурлануга тагын бер сәбәп барлыкка килде.

«Кече ватаныңның бөеклеген аңлау, син үрнәк итеп тоткан мисаллар булу, өлкәннәр белән бертигез эшләгән яшьтәшләреңнең эшләрен һәм үзең башкарган эшләрне чагыштыру - барысы да мөһим», - дип билгеләде Илсур Метшин. «Алар аркасында без тыныч тормышта яшибез, әмма әлеге исем безнең барыбызга да ата-бабаларыбызның бөеклегенә тигезләшергә тырышу йөкләмәсен бирә. Һәм без аларга лаеклы булу, Казан һәм илебез хакына хезмәт итү өчен бөтен көчебезне куячакбыз!» - дип өстәде Казан Мэры.

Исегезгә төшерәбез, Казанны хезмәт батырлыгы шәһәре буларак тануга 2 млн 400 мең имза җыелган иде. Гаризаны Татарстан башкаласында яшәүчеләр, ветераннар оешмалары һәм сәнәгать предприятиеләре генә түгел, бөтен республика халкы, Мәскәүнең иҗтимагый оешмалары, Россиянең һәм чит илләрнең татар мәдәни үзәкләре дә хуплады.

Казанлылар стела урнаштыру урыны сыйфатында тәкъдим иткән вариантлар арасында - Елга порты районындагы яр буе, эре сәнәгать предприятиеләре тупланган Авиатөзелеш районы, тимер юл вокзалы тирәсе, Кабан күле буе, Җиңү, Урицкий исемендәге һәм «Крылья Советов» парклары, Төньяк вокзал районы һәм башкалар бар иде.

Шулай ук укыгыз

Барлык яңалыклар