Йөздән артык кеше әйдаманнарның «Әйдаман уты!» мәктәбен ачуда катнашты

Биредә педагоглар өчен дә, студентлар һәм мәктәп укучылары өчен дә укулар үткәреләчәк

Фото: Балалар һәм яшьләр эшләре комитеты

Йөздән артык кеше әйдаманнарның «Әйдаман уты!» мәктәбен ачуда катнашты. Чара «Маяковский» иҗат киңлегендә узды. Бирегә килүчеләр арасында 15 яшьтән алып 18 яшькә кадәрге студентлар һәм мәктәп укучылары бар иде.

Мәктәптә уку-укыту өч программа буенча гамәлгә ашырылачак. Курс онлайн-дәресләрне, лекцияләрне, гамәли дәресләрне һәм өй эшләрен үз эченә ала. Укуларны балалар лагерьларында һәм педагогия учреждениеләрендә эшләүче белгечләр алып барачак, дип хәбәр итә балалар һәм яшьләр эшләре комитеты.

Беренче программа – әйдаманнар өчен. Курста катнашучылар командада эшләү күнекмәләренә, чаралар оештырырга һәм һәр бала белән уртак тел табарга өйрәнәчәк. Алар үз белемнәрен җәй көннәрендә «Ял» шәһәр үзәге тарафыннан оештырылган сменаларда куллана алачак.

Икенче программа 18 яшькә кадәргеләрне күз алдында тотып эшләнгән. Алар әйдаманнар ярдәмчеләре булачак. Курсны узучыларның беренче хезмәт хакларын Казан лагерьларында эшләп алу мөмкинлеге бар. Мәктәптә алар өчен интенсив әзерләнгән.

Педагог-оештыручылар өчен дә программа әзерләнгән. Курста төрле проектларны ничек эшләргә һәм гамәлгә ашырырга кирәклеге турында сөйләячәкләр.

Әйдаманнар мәктәбе Казан шәһәре Башкарма комитетының балалар һәм яшьләр эшләре комитеты карамагындагы «Ял» шәһәр үзәге таарфыннан оештырыла. Курслар 2016 елдан бирле үткәрелә, ел саен аларда 150 дән артык кеше белем ала.

Шулай ук укыгыз

Барлык яңалыклар