Керү
Парольне алмаштырырга
Парольне алмаштырырга

Парольне онытсагыз, E-Mail адресыгызны кертегез. Парольне алмаштыру өчен кирәкле мәгълүмат E-Mail адресына җибәреләчәк.

Шәхси кабинетка керү
Техник ярдәм күрсәтүгә хәбәр җибәрү
Размер:
AAA
Цвет: CCC
Изображения Вкл.Выкл.
Обычная версия сайта
04.06.2020, 14:40

И.Метшин Зур Казан боҗрасы турында: «Бу юл безгә шәһәр үзәгенә төп магистральләр буйлап баручы автомобиль агымнарын «бушатырга» ярдәм итәчәк»

Мидхәт Булатов урамыннан Техника урамына кадәрге яңа юл участогында трамвай рельсларын салу һәм яшелләндерү эшләре төгәлләнә.


(Казан шәһәре KZN.RU, 4-нче июнь, Ксения Швецова). Бүген Казан Мэры Илсур Метшин Мидхәт Булатов урамыннан Техника урамына кадәрге участокта Зур Казан боҗрасы төзелеше барышын тикшерде. Универсиадага әзерлектән кала иң зур юл проектында эшләр тулы көченә бара. Төзүчеләр аралык корылмаларын бетонлаштыруны һәм юл өслеген салуны төгәлләп киләләр, шуның белән бергә трамвай рельсларын салу эшләре бара, меңгә якын агач утыртылган.

Зур Казан боҗрасының беренче участогында эшләр 90%-ка үтәлгән

Яңа юл Җиңү проспектының дәвамы булачак, ул «Кояшлы шәһәр» районы аша Югары Кабан күленә чыгачак һәм аннан соң Техника урамына барып җитәчәк. Шулай итеп, әлеге юл Идел һәм Кабан күлләре арасындагы сәнәгать зонасы белән торак өлешне иң кыска юл ярдәмендә тоташтырачак. Трамвай юллары, Ферма шоссесындагы юл чишелеше, җәяүлеләр өчен чыгу юлы булган дүрт полосалы юлның әлеге участогын төзү 2013 елгы Универсиадага әзерлектән соң иң эре инфраструктура проекты булды.

«Зур Казан боҗрасы - Казанның иң мөһим транспорт артерияләренең берсе. Бу бик мөһим проект, без аны гамәлгә ашыруга «Имин һәм сыйфатлы автомобиль юллары» федераль программасы һәм республика Президенты Рөстәм Миңнеханов ярдәме белән керешә алдык», - дип билгеләп үтте И.Метшин.

Быел Казанда яңа юллар төзүгә һәм булганнарын капиталь ремонтлауга өчен 7,5 млрд сум акча юнәлдерелде, шуларның 2,8 млрд сумы - Зур Казан боҗрасы участогы төзелешенә.

Әлеге участокта Зур Казан боҗрасын төзү ике этапта алып барыла. Мидхәт Булатов урамыннан Борисково урамына кадәрге участокта эшләр узган елның июлендә старт алды. Бу участокта Ферма шоссесы өстеннән узучы юлүткәргеч һәм җәяүлеләр кичүе белән 800 м озынлыктагы дүрт полосалы юл төзелә. Төзүчеләр параллель рәвештә Техника урамына кадәр трамвай рельсларын салалар, аларны тоташтыру трамвай маршрутын боҗраларга мөмкинлек бирәчәк, дип хәбәр итте Мэрга Башкарма комитет җитәкчесе урынбасары - Тышкы төзекләндерү комитеты рәисе Игорь Куляжев. Боҗралы трамвай маршрутының гомуми озынлыгы 34 чакрым тәшкил итәчәк - бу Россиядә иң озын трамвай маршруты булачак.

Бүгенге көндә барлык эшләр графиктан артта калмый, һава торышы уңайсыз хәлдә калдырмаса, төзелеш билгеләнгән вакытта төгәлләнәчәк, дип билгеләп үтте «Главтатдортранс» дәүләт казна учреждениесенең төзелеш буенча директор урынбасары Руслан Мусин. «Беренче этап кысаларында эшләр 90%-ка үтәлгән. Эшчеләр, юлүткәргечтәге барлык аралык корылмаларын бетонлау эшләрен төгәлләп, бу участокта барлык бетонлау эшләрен башкардылар, - дип аңлатты ул. - Хәзер гидроизоляция ясауга әзерлек бара. Алга таба юл катламын салу һәм трамвай аралыгы буенча эш дәвам итәчәк. Мидхәт Булатов урамыннан юлүткәргечкә кадәр аскы катламда юл өлеше тулысынча үтәлгән, өслекнең өске катлавын салып, билге саласы гына калган. Асылда, эшләр финиш этабына чыкты дип әйтергә мөмкин».

Зур Казан боҗрасының беренче этабында көн саен 60 белгеч һәм 35 берәмлек махсус техника эшли, дип өстәде «Главтатдортранс» дәүләт казна учреждениесенең төзелеш буенча директор урынбасары.

Мартта Борисково урамыннан Техника урамына кадәр 1,222 чакрым озынлыктагы участокта Зур Казан боҗрасы төзелешенең икенче этабы старт алды. Р.Мусин хәбәр иткәнчә, бүгенгә бу участокта эшләр 35-40%-ка башкарылган. Бүген анда эш берьюлы берничә юнәлеш буенча бара: коммуникацияләр яңадан көйләнә, юл өслеге салына, трамвай рельсларын салу өчен участоклар әзерләнә һәм Монастырь агымы аша күпер төзелә. Күпер өчен терәк баганалар торгызу буенча бетон эшләре төгәлләнде, хәзер эш вакытында таяныч булачак махсус корылмалар һәм ярдәмче корылмалар монтажлана, арматураны тоташтыру һәм башка эшләр алып барыла.

Участокта меңгә якын эре агач утыртылган

Параллель рәвештә якын-тирәдәге территорияләрне төзекләндерү эшләре алып барылу да Зур Казан боҗрасының әлеге участогы төзелешенең үзенчәлеге булып тора. Хәзерге вакытта юл янында утырту планлаштырылган 1044 эре агачның 928-е, шулай ук 3 мең куакның 2,5 меңнән артыгы утыртылган инде.

«Утырту юлның аерым участокларының әзер булу дәрәҗәсенә бәйле башкарыла. Хәзер, мәсәлән, терәк диварларын буяу, җир өсте җәяүлеләр кичүен төзү эшләре әле төгәлләнмәгән. Ул тәмамлану белән, алар янында да агачлар, куаклар утыртылачак», - дип билгеләп үтте Р.Мусин, хәзерге вакытта яшелләндерү 95%-ка тәмамланды, дип өстәде.

Үсемлекләр утыртудан тыш, 10 чакрым озынлыкта аларга су сибү системасы да монтажлана, тышкы яктырту челтәрләре булдырыла, дип хәбәр итте Игорь Куляжев.

Исегезгә төшерәбез, быел Казанда юлларны төзүгә, реконструкцияләүгә һәм капиталь ремонтлауга 7,5 млрд сум акча юнәлдерелгән. Шуларның 1 млрд 300 млн сумы яңа объектларны проектлауга, төзүгә һәм реконструкцияләүгә, 1,5 млрд сумы «Имин һәм сыйфатлы автомобиль юллары» илкүләм проектына, 2,8 млрд сумы Зур Казан боҗрасы участогы төзелешенә җибәрелгән.

Төзелеш барышы белән танышуда Вахитов һәм Идел буе районнары хакимияте башлыгы Андрей Лобов та катнашты.

Фоторепортаж
Казан Мэры Мидхәт Булатов урамыннан Борисово урамына кадәрге участокта юл төзелеше барышы белән танышты
Видеорепортаж
04.06.2020 13:05
Барлык яңалыклар