Казан студентлары нефть продуктлары агу нәтиҗәләрен бетерү өчен Кара диңгез яр буена китте

Булачак мал табибларын зыян күргән кошлар белән эшләүгә җәлеп итәргә планлаштыралар

Н.Э.Бауман исемендәге Казан дәүләт ветеринария медицинасы академиясе студентлары Краснодар краенда нефть продуктлары агу нәтиҗәләрен бетерүдә ярдәм күрсәтергә киттеләр. 15 студентның ирекле командировкасы ике атна дәвам итәчәк.

Волонтерларның берсе 5 курс студенты, КДВМА студентлар советы рәисе Ксения Агапова булды. Аның фикеренчә, кирәк булганда, Татарстан һәрьяклап ярдәм күрсәтә.

«Бу глобаль экологик һәлакәт. Без читтә калмаска һәм теләсә нинди ярдәм күрсәтергә тиеш. Безнең очракта бәхет елмайды: волонтерлар җыелмасы ачылды – без, уйлап та тормыйча, шунда ук исемлекне төзедек. Без булышырга барабыз, өстәвенә белем алу профиле буенча», – дип уртаклашты KZN.RU корреспонденты белән Ксения Агапова.

Иреклеләрнең беренче отрядына барлыгы 35 кеше, шул исәптән Яшел Үзән, Мамадыш һәм Түбән Кама уку йортларыннан студентлар кергән. Отрядның җитәкчесе – «Игелекле Яшел Үзән» волонтерлык үзәге директоры Светлана Янтуганова булды.

КДВМА студентларын зыян күргән кошлар янына тернәкләндерү үзәгенә волонтерлар итеп җибәрү планлаштырыла. Башка студентлар яр буендагы нефть продуктлары агу нәтиҗәләрен җиңәргә ярдәм итәчәк.

Хәзер иреклеләр билгеләнгән урынга кадәр юлда. Алар иртәгә иртән килеп җитәчәкләр һәм шунда ук эшкә керешәчәкләр. Волонтерларны отрядның эш зонасы янында урнашкан Витязево пансионатларының берсенә урнаштырачаклар.

Шулай ук укыгыз

Барлык яңалыклар