Татарстанлылар үзизоляция режимы гамәлдә булган чорда өйдән чыгу өчен якынча 8 млн рөхсәт сораган

Үзизоляция режимы гамәлдә булган вакытта рөхсәтләр системасында 1,5 миллионга якын татарстанлы теркәлгән.

(Казан шәһәре KZN.RU, 29-нчы апрель). Үзизоляция режимы гамәлдә булган вакытта өйдән чыгу өчен цифрлы рөхсәтләр системасында 1,5 миллионга якын татарстанлы теркәлгән. 1-нче апрельдән башлап, сервис бер айдан да азрак вакыт эшләгән чорда, республика халкы 8 млн га якын рөхсәт сораган.

Дачага чыгу яки дачадан кайту элеккечә өйдән чыгуның иң кирәкле сәбәбе булып тора. Бу максат буенча 3,6 млн нан артык цифрлы рөхсәт бирелгән. Икенче урында - дарулар, азык-төлек продуктлары һәм беренче кирәк-яраклар китерү. Татарстанлылар бу максат буенча 2 млн код сораганнар.

Үз профессиональ эшчәнлекләрен гамәлгә ашыру өчен цифрлы рөхсәт алу мөмкинлеге 13-нче апрельдән барлыкка килде. Бу вакыт эчендә системада теркәлүне 3350 кулланучы узган. Гомумән алганда, аларга 15 меңнән артык рөхсәт бирелгән. Еш кына үзмәшгуль татарстанлыларга җитештерү биналарына бару өчен рөхсәт кирәк булган. Бу максатка якынча 6 мең рөхсәт туры килә, дип хәбәр итә ТР Дәүләт идарәсенең, мәгълүмат технологияләренең һәм элемтәсенең цифрлы үсеш министрлыгы матбугат хезмәте.

Смс-хәбәр яки сайттагы шәхси кабинет аша системада теркәлү узарга һәм цифрлы рөхсәт алырга мөмкин. Татарстанлыларга системада теркәлү узу һәм өйдән чыгу өчен кодларны смс-хәбәрләр җибәреп алу мәҗбүри түгел. Сервиста паспорт мәгълүматларын һәм телефон номерын күрсәтеп, үз шәхси кабинетыңны булдыру да җитә. Башка ил гражданнары документ сыйфатында яшәүгә рөхсәт кәгазен, миграция картасын яки визаны файдалана ала.

Республикада цифрлы рөхсәтләр алу мәсьәләләре буенча халыкның консультация-үзәге эшләвен дәвам итә. Шалтыратулар кайнар линия буенча кабул ителә: +7(800)250-90-93.

Шулай ук укыгыз

Барлык яңалыклар