Рөстәм Гафаров: «Икенчел чималны тапшыру – ул үзебезне үзебез хөрмәт итә алырлык гамәл»

Казанда киләсе елның 13–31 гыйнвар көннәрендә «Эх, чыршысы» акциясе уздырыла, чара барышында иске чыршыларны кабул итү өчен 18 нокта ачыла

Марат Мөгыйнов фотосы

Матур гадәт буенча, «Эх, чыршысы» акциясе Казанда 13 гыйнварда башланып китә һәм 31 гыйнварга кадәр дәвам итәчәк. Бу вакытта шәһәрдә иске чыршыларны кабул итү өчен 18 нокта эшләячәк, шулай ук икенчел чимал җыю нокталары һәм сары челтәрләр эше дә дәвам иттереләчәк. Бу хакта аппарат киңәшмәсендә Казан Башкарма комитеты җитәкчесе урынбасары Искәндәр Гыйниятуллин хәбәр итте.

«Шәһәр халкы әле чыршыларны куя гына башлады, әмма бәйрәмнәрдән соң аларны урнаштыру турында да искә төшерү мөһим. «Эх, чыршысы» акциясе өчен төбәк операторына, әлеге акциягә теләктәшлек белдерүче волонтерларга һәм эшмәкәрләргә рәхмәт. 18 җыю ноктасы булу – бу яхшы күрсәткеч, әмма чыршыларны оешкан рәвештә җыю челтәре тагы да күбрәк булсын өчен тырышырга кирәк», - диде Казан Башкарма комитеты җитәкчесе Рөстәм Гафаров.

Акцияне уздыру вакытында шәһәр халкы иске чыршыны 18 кабул итү ноктасының берсенә тапшыра алачак. Чараны «ПЖКХ» идарәче компаниясе төбәк операторы «Чиста уеннар» волонтерлар хәрәкәте белән бергә оештыра.

Ылыслы агачларны кабул итү пунктлары исемлеге:

Совет районы:

– «Весна» торак комплексы (Азат Аббасов урамы, 3 һәм Азат Аббасов урамы, 8 адресы буенча урнашкан йортлар арасында);
– МЕГА сәүдә үзәге (Җиңү проспекты, 141);
– җыю ноктасы (Родина урамы, 45);
– Татарстан Республикасы төзелеш тармагы барлыкка килүнең 100 еллыгы скверы;
– «Яратам» торак комплексы (Бохара урамы, 32);
– «Малиновка» торак комплексы (Академик Завойский урамы, 21Б).

Вахитов һәм Идел буе районнары:

– Чехов базары (Чехов урамы, 2);
– «Җиңү проспекты» метросы (Зорге урамы, 75);
– «Привилегия» торак комплексы (Бертуган Касыймовлар урамы, 35).

Яңа Савин һәм Авиатөзелеш районнары:

– «Ак чәчәкләр» бульвары (Әпсәләмов урамы, 23);
– «Континент» паркы (Ямашев проспекты, 104, 2 корп.);
– «Лента» (Адоратский урамы, 21А);
– «Ленин» мәдәният сарае (Копылов урамы, 2А).

Киров һәм Мәскәү районнары:

– Серов бульвары (Серов урамы, 10а йорты каршында, 10А);
– җыю ноктасы (Васильченко урамы, 6);
– Арсланов урамы, 6А, 1 ск.;
– «5 йолдыз» торак комплексы (Комсомол урамы, 2);
– Richmond торак комплексы (Идел буе урамы, 210).

«Ел башы – экологик яшәү рәвешенә күчү өчен менә дигән вакыт. Яңа ел өстәлләреннән бушап калган күп кенә төргәкләрне төрләргә аерып, икенчел чимал өчен билгеләнгән сары контейнерларда калдырырга була», - дип өндәде шәһәр халкын Искәндәр Гыйниятуллин.

Шул уңайдан ул Казан ишегалларының дүрттән өч өлешендә икенчел чималның төп 5 төрен җыю өчен контейнерлар, шулай ук текстиль җыю өчен махсус савытлар булуын искәртте. Казанда барлыгы 2 меңнән артык сары челтәр һәм текстиль җыю өчен 226 контейнер урнаштырылган, дип хәбәр итте чыгыш ясаучы.

Сары челтәрләрдән тыш, бәйрәм көннәрендә зур икенчел чимал җыю нокталары: Родина урамы, 45; Васильченко урамы, 6; Давыдов урамы, 75 һәм Үзәк Мариуполь урамы, 49б адресы буенча урнашкан киңлекләр эшләячәк. Мондый чүп җыю нокталарыннан һәм савытлардан җыеп алынган икенчел чимал эшкәртүчеләргә тизрәк барып җитә, «икенче сулыш ала» һәм полигондагы чүп күләмен киметә, дип өстәде чыгыш ясаучы.

«Экологик үзаң һәм Яңа елны уздыру хакында яңгыраган фикерләр белән тулысынча килешәм. Мондый яшәү рәвеше алып баручылар сокландыра. Калдыкларны төрләргә аеру, икенчел чималны тапшыру һәм үзеңнең көнкүреш тәртибеңә карата уйланылган мөнәсәбәттә булу – ул үзебезне үзебез хөрмәт итә алырлык гамәл. Һәм балаларыбыз, оныкларыбыз киләчәктә моның кадерен белерләр», - дип сүзен йомгаклады Рөстәм Гафаров.