Зумба һәм гимнастика: бүген «Өй янындагы спорт» проектының җәйге сезоны тәмамлана

Шәһәр халкы бергәләп күнегүләр ясарга 13:00 сәгатькә килә ала

Бүген Казанда «Өй янындагы спорт» проектының җәйге сезоны тәмамлана. Шул уңайдан башкала халкын бергәләп күнегүләр ясарга чакыралар. Чараны оештыручылар кунаклар өчен сулыш һәм буын гимнастикасы, көч күнегүләре әзерли, программа исә дәртле зумба биюе белән тәмамланачак.

Моннан тыш, «Безнең ишегалды чемпионнары» ишегалды лигасы җиңүчеләрен бүләкләү чарасы көтелә. Барлык теркәлүчеләрнең дә проект партнерларыннан бүләкләр оту мөмкинлеге бар.

Чара Үзәк стадион манежында 13:00 сәгатьтә башлана.

Үзең белән икенче аяк киеме һәм спорт формасын алып килү мөһим. Катнашу өчен биредә теркәлергә кирәк.

Спорт чарасы Ташаяк урамы, 2а йорты адресы буенча уздырыла.