Казанда 9 май бәйрәме көнне хәрби техника күргәзмәсе тәкъдим ителә

Күргәзмә Меңьеллык мәйданында 18:00 сәгатькә кадәр оештырыла

Марат Мугинов фотосы

9 майда Казанның Меңьеллык мәйданында хәрби техника күргәзмәсе оештырыла, анда 13 хәрби машина тәкъдим ителәчәк. Экспозиция Бөек Ватан сугышы чорының легендар техникасын да, заманча хәрби машиналарны да берләштерәчәк.
Тарихи экспонатлар арасында легендар Т-34 танкы, ИС-3 авыр танкы, СУ-100 үзйөрешле артиллерия җайланмасы, БМ-13 «Катюша» залплы ут реактив системасы, танылган ЗИС-5 йөк автомобиле һәм ПТ-76 йөзүче танкы булачак.

Алар янында Россия армиясе куллана торган заманча үрнәкләр урнашачак. Мәсәлән, югары чыдамлыгы белән аерылып торган Т-90М танкы һәм үзенең тизлеге аркасында «оча торган танк» дигән кушамат алган Т-80БВМ техникасын күрергә мөмкин.

Мәйданчыкта яңартылган Т-72БЗ, БМП-3 пехота хәрби машинасы, суда булганда да ату мөмкинлеге сакланган, танкларга ярдәм итүче БМПТ хәрби машинасы һәм Улан-2 Россия вездеходы тәкъдим ителәчәк.

Хәрби машиналарны иртәдән 18:00 гә кадәр килеп карарга мөмкин булачак. Күргәзмә сәхнәнең уң ягында, Үзәк стадионның машина кую урынында оештырылачак.

Исегезгә төшерәбез, 1941-1945 еллардагы Бөек Ватан сугышында Җиңүнең 81 еллыгы уңаеннан гаскәрләрнең тантаналы парады 2026 елның 9 маенда Меңьеллык мәйданында узачак. Тамашачылар Казан Кремле диварлары астында урнаша алачак. Турыдан-туры тапшыру ТНВ телеканалы, шулай ук социаль челтәрләрдә оештырылачак.

Гаскәрләрнең тантаналы парадында Казан гарнизоны хәрбиләре, хәрби училище курсантлары, хәрби кафедралар студентлары һәм башка структуралар вәкилләре катнашачак.

Шулай ук укыгыз

Барлык яңалыклар