Казан Кремленең Гавами урыннары ишегалдында рус ишарәләр теленә тәрҗемә белән бушлай экскурсияләр узачак

Катнашу өчен алдан теркәлергә кирәк.

Фото: Денис Гордийко

(Казан шәһәре KZN.RU, 28 нче декабрь). Гыйнвар аенда Казан Кремленең Гавами урыннары ишегалдында рус ишарәләр теле тәрҗемәчеләре катнашында бушлай экскурсияләр узачак. Килүчеләр шәһәрнең яңа иҗтимагый киңлеге тарихы, аның үзгәртеп корулары һәм үсеш планнары турында беләчәкләр.

4 нче гыйнварда – Салина Гарнаева, 7 нче гыйнварда Екатерина Ибәтуллина тәрҗемәче сыйфатында чыгыш ясаячак. Ике экскурсия дә 14:00 сәгатьтә Гавами урыннарның беренче подъездының керү аркасы янында старт ала, дип хәбәр итә Татарстан шәһәрләрен үстерү институты матбугат хезмәте.

Урыннар саны чикле. Катнашу өчен +7(986)917-78-61 телефоны буенча язылырга кирәк.

Исегезгә төшерәбез, Казан Кремленең Гавами урыннары ишегалдында Яңа ел чаралары сериясе гыйнвар уртасына кадәр дәвам итәчәк. Программада – музыкаль кичәләр, Казан актерларыннан әкиятләр уку, спектакльләр күрсәтү һәм архитекторлардан экскурсияләр.

Шәһәрнең яңа җәмәгать мәйданы буларак Гавами урыннары ишегалды 20 нче декабрьдә ачылды. Территория өчен архитекторлар туристларны Татарстан, ә шәһәрлеләрне яңа иҗтимагый киңлек белән таныштыру өчен махсус бизәү концепциясен эшләделәр. Ишегалдында урнаштырылган 17 метрлы чыршы бизәлешендә татар орнаментлары һәм традицион милли бизәнү әйберләре формалары кулланыла.

Шулай ук укыгыз

Барлык яңалыклар