Казанда эшсезләр саны бер ел эчендә 3,7 тапкырга – 20 мең кешегә кимегән

2021 ел ахырына Казанда 4671 эшсез кеше теркәлгән, бу ел башындагыга караганда дүрт тапкырга кимрәк дигән сүз. Агымдагы елның 1 нче гыйнварына ТР башкаласында теркәлгән эшсезлек дәрәҗәсе эшче көчләр саныннан 0,7%ны тәшкил иткән.

Мәшгульлек үзәкләренә мөрәҗәгать итүчеләрнең 78%ы эшкә урнаштырылган – 20 меңнән артык кеше, шул исәптән 14 мең эшсез. Мәгариф, сәүдә, сәламәтлек саклау, транспорт, җитештерү өлкәләрендә эшләүчеләргә аеруча ихтыяҗ зур булды.

153 кеше вакытлыча эшкә урнашу программаларында катнашты. Шулай ук 784 мәктәп укучысы һәм урта һәм югары белем бирү учреждениеләрен тәмамлаган 24 кеше вакытлыча эшләрдә катнашты. 1800 кеше җәмәгать эшләренә җәлеп ителде.

117 кеше үз эшләрен ачуга субсидияләр алды – яңа эш башлаучы эшмәкәрләргә 145әр мең сум акча бирелде. Гомуми ярдәм күләме 17 млн. сумга якын тәшкил итте.

Субсидияләрне эш бирүчеләр дә алды – 249 эшсезне эшкә урнаштыру өчен 5 млн. сумнан артык акча компанияләргә тапшырылды. Быел ярдәм күрсәтүне дәвам итәчәкләр, әмма адреслы булачак – акчалар 30 яшькә кадәрге кешеләрне эшкә урнаштыру өчен тотылачак.

«Ворлдскиллс Россия» хәрәкәте, Томск дәүләт университеты һәм Россия Халык хуҗалыгы һәм дәүләт хезмәте академиясе ярдәме белән 3 мең шәһәрле базарда ихтыяҗ зур булган белгечлек буенча укулар узган. Аларның 90%ы яңа эшкә урнашкан яки элеккеге эшләрендә югары хезмәт хакы ала башлаганнар.

Узган ел мәшгульлек хезмәтенә мөмкинлекләре чикле 1159 кеше мөрәҗәгать иткән, 777се инженер, укытучы, тегүче, кассир кебек белгечлекләр буенча эш алган. Инвалидлар арасыннан 40 кеше һөнәри белем алган һәм «1С: сәүдә белән идарә итү», ландшафт дизайны, веб-дизайн, цифрлы программалар белән идарә ителә торган станоклар буенча өстәмә белем алган.