Казанда Яңа ел салютларын куллану өчен дүрт махсус мәйданчык әзерләнгән

Шәһәрнең барлык районнарында фейерверклар куллану өчен дүрт мәйданчык  оештырылган. Совет районында салют өчен - Нәҗип Җиһанов һәм Петр Полушкин урамнары арасындагы Казан ипподромы янында, Вахитов һәм Идел буе районнарында – Каенлыктагы «Сабантуй» мәйданчыгы каршында автомобиль стоянкасында, Авиатөзелеш һәм Яңа Савин районнарында - Гаврилов урамындагы мәйданда, ә Киров һәм Мәскәү районнарында яшәүчеләр пиротехниканы Түбән Заречная дамбасында куллана алачак. Барлык мәйданчыкларда да коткаручылар һәм янгын сүндерүчеләр кизү торачак.

Билгеләнгән мәйданчыклардан тыш пиротехник чаралардан файдаланган өчен гражданнарга янгын куркынычсызлыгы таләпләрен бозган өчен 2000-4000 сум күләмендә административ штраф салыначак.

ТР Министрлар Кабинеты карары нигезендә, 2019 елның 20-нче декабреннән 2020 елның 8-нче гыйнварына кадәр Казан территориясендә янгынга каршы махсус режим урнаштырылган. Бу чорда куркынычсызлыкны тәэмин итү өчен бердәм кизү тору-диспетчерлык хезмәте көчәйтелгән режимда эшләячәк, шулай ук мөмкин булган вакыйгаларга оператив җавап бирү өчен махсус төркем оештырылачак.

2019 елның 30-нчы декабреннән 2020 елның 15-нче гыйнварына кадәр район администрациясе, янгынга каршы хезмәт, полиция, торак-коммуналь инспекция хезмәткәрләре һәм халыкны социаль яклау идарәсе хезмәткәрләре торак йортларда гражданнар белән профилактик әңгәмәләр үткәрәчәк. Күп балалы гаиләләргә, өлкән яшьтәге ялгызларга һәм авыр тормышлы гражданнарга, шулай ук тәүлек буе кешеләр яши торган социаль өлкә объектларына аерым игътибар биреләчәк.

Идарәче компанияләргә һәм коммуналь хезмәтләргә авария хәлендәге бригадаларның мөмкин булган кадәр күбрәк чыгуын оештырырга, идарә персоналы составыннан җаваплы затларның кизү торуын тәэмин итәргә, чардак һәм подвал бүлмәләрен ябу предметына тикшерергә һәм хезмәткәрләр арасында янгын куркынычсызлыгы чаралары буенча инструктаж үткәрергә тәкъдим ителде.

Шунысын да билгеләп үтәргә кирәк, узган ел Яңа ел бәйрәмнәре вакытында дүрт кеше, шул исәптән бер бала пиротехник эшләнмәләр куллану нәтиҗәсендә термик пешүләр алган, ә 2018 елның 24-нче декабреннән 2019 елның 9-нчы гыйнварына кадәр Казанда 26 янгын булган, алар нәтиҗәсендә дүрт кеше зыян күргән, берсе һәлак булган.