Совет районында быел мәктәп, поликлиника һәм табиб офисы төзеләчәк

Казанның Совет районында 2025 елда 5748 фатирлы 18 яңа торак йорт төзергә планлаштыралар. Узган ел районда 11 күп фатирлы йорт һәм 2,6 меңгә якын шәхси йорт төзелгән.

Торак төзелеше артыннан Совет районының социаль инфраструктурасы актив үсеш ала. 2025 елда Таҗетдинов урамындагы «Лето» торак комплексында 1224 укучыга исәпләнгән бассейнлы гомуми белем бирү мәктәбе төзеләчәк. Ул яңа микрорайонда өченче мәктәп булачак, анда тиздән 30 мең кеше яшәячәк. Узган ел районда 2725 урынга исәпләнгән ике яңа мәктәп һәм 260 бала өчен бер балалар бакчасы төзелде инде. Районда барлыгы 46 гомуми белем бирү учреждениесе эшли, анда 49 мең бала укый, 119 балалар бакчасы бинасы, анда 21 мең бала йөри.

Бер елга 125 нче гимназияне һәм 415 нче балалар бакчасын капиталь ремонтлау планлаштырыла.

«Весна» торак комплексында быел көненә 400 пациентка кадәр хезмәт күрсәтүгә исәпләнгән өлкәннәр поликлиникасы барлыкка киләчәк. Моннан тыш, якындагы бистәләрдән 15 мең казанлы өчен «Вишневка» торак массивында табиб офисы төзү планлаштырыла.

2025 елга Сеченов урамындагы наркология диспансерына һәм Җиңү проспектындагы йогышлы авырулар хастаханәсенә капиталь ремонт ясау планлаштырылган.

Агымдагы елда инженерлык лицееның ашханәсе төзекләндереләчәк. Ул Совет районында мәктәп ашханәләрен яңарту программасының соңгы объекты булачак. Программа башланганнан бирле район мәктәпләрендә барлыгы 35 азык-төлек блогы яңартылган.

Якын арада Солидарность урамындагы 12 нче йортта яшүсмерләр клубына капиталь ремонт ясалачак. Академик Арбузов урамындагы 6 йорт адресы буенча урнашкан клубка ремонт ясау планлаштырыла.

Соңгы таләпләр нигезендә һөнәри уку йортлары биналары да яңартыла. Быел ремонт педагогика көллиятенең Латыш укчылары урамындагы тулай торагында үткәреләчәк. Былтыр яңарту Себер трактындагы КМТТУ-КХТИ мәдәни-ял һәм спорт үзәкләренә, Даурия урамындагы 30 йорт адресы буенча урнашкан педагогика көллияте лабораторияләренә, шулай ук КФУ тулай торагына һәм төзелеш көллиятенә кагылды.

Совет районында ел дәвамында алты универсаль спорт мәйданчыгы төзү планлаштырыла. 2024 елда районда шундый тугыз мәйданчык төзекләндерелде. Моннан тыш, Бокс һәм өстәл теннисы үзәгендә, «Казан» Ат спорты комплексында зур ремонт ясалган. Быел «Ракета» стадионын яңарту буенча эш дәвам итәчәк.