2025 елда икенчел чимал «Җыю нокталары»ннан төрле төрдәге 270 тонна калдык җыеп алынган

Бу елны Казанда икенчел чимал җыю өчен яңа пунктлар ачылачак

Марат Мөгыйнов фотосы

2025 елда Казанда беренче тапкыр оештырылган «Җыю ноктасы» дигән ике экопункттан 270 тонна икенчел чимал эшкәртүгә җибәрелгән. «ПЖКХ» идарәче компаниясе» җаваплылыгы чикләнгән җәмгыяте төбәк операторы оештырган мәйданчыкларга 25 меңнән артык гражданин килеп киткән. Бу хакта аппарат киңәшмәсендә компаниянең генераль директоры Евгений Чекашов хәбәр итте.

Кабул итү пунктларының берсе – Васильченко урамы, 6 йорт, икенчесе Родина урамы, 45 йорт адресы буенча урнашкан. Йомшак пластик, картон, пэт һәм резина иң популяр калдыклар рәтендә.

Бер ел эчендә җыю пунктларына экологиягә битараф булмаган 25 меңнән артык гражданин килеп киткән, дип хәбәр итте чыгыш ясаучы.

Бу елны төбәк операторы икенчел чимал җыю өчен яңа пунктлар ачарга ниятли.

«ПЖКХ» идарәче компаниясе» җаваплылыгы чикләнгән җәмгыятеннән тыш, узган ел икенчел чималны төрләргә аерып җыю пунктларын шәхси эшмәкәрләр дә ачкан – яңа экопунктлар Авиатөзелеш районының ике контейнер мәйданчыгында урнашкан.

«Без коллегаларыбыз белән эш башыннан ук хезмәттәшлек иттек һәм мондый тәкъдимнәргә шатбыз. Тәҗрибә белән уртаклашырга һәм мондый эшмәкәрлеккә алга таба да ярдәм итәргә әзербез», - дип сүзен йомгаклады Евгений Чекашов.

Исегезгә төшерәбез, бу елны «сары челтәрләр» шәһәрдәге барлык контейнер мәйданчыкларына урнаштырылачак. Башкалада барлыгы яңа 3 мең контейнер барлыкка киләчәк.