Татарстан Милли музеенда Әниләр көнен билгеләп үтәчәкләр

Фото: Марат Мугинов

(Казан шәһәре KZN.RU 26-нчы ноябрь). Татарстанның Милли музеенда 27-нче ноябрь көнне «Әниләр көне» билгеләп үтеләчәк. Чара Әниләр көненә багышланган. Бәйрәм программасында – җанлы музыка, мода театрыннан дефиле, шулай ук балалар өчен мастер-класс.

Килүчеләрне 11:00 сәгатьтә музей буйлап иммерсив экскурсия көтәчәк: кунаклар хатын-кызларның элек нинди һөнәр белән шөгыльләнүләре, йорт хуҗалыгын ничек алып барулары, киенүләре һәм нәрсә белән бизәнүләре турында беләчәк. Килүчеләрне тарихи персонажлар – Екатерина II һәм Сөембикә каршы алачак.

12:00 сәгатьтә музейда җанлы музыка яңгыраячак. 13:00 сәгатьтән 14:00 сәгатькә кадәр «Илдан Лик» мода театры Казан дизайнерларыннан хатын-кызлар һәм балалар киемнәренең эксклюзив модельләрен күрсәтәчәк, дип хәбәр итә ТР Милли музее матбугат хезмәте.

Музейда 14:00 сәгатьтән 15:00 сәгатькә кадәр «Әнигә үз кулларым белән» иҗат остаханәсе эшләячәк, анда кечкенә кунаклар үз куллары белән курчак, вак бизәнү әйберләре, тәбрикләмә яки чәчәк ясый алачак.