13 декабрьдән шәһәр яны поездлары яңа җәдвәл буенча йөри башлаячак

Үзгәрешләр Казаннан Зөя, Сосновка, Канаш, Паратск, Албаба, Арча станцияләренә кадәр хәрәкәт итүче поездларга кагыла.

Фото: Казан шәһәре KZN.RU

(Казан шәһәре KZN.RU, 1-нче декабрь). 13-нче декабрьдән кайбер шәһәр яны поездларының йөрү тәртибе үзгәрәчәк. Хәрәкәтнең яңа графигына Казаннан Зөя, Сосновка, Канаш, Паратск, Албаба, Арча станцияләренә кадәр электричкалар күчәчәк.

Гамәлдәге җәдвәл белән биш минуттан артык аерма 6355, 6003 номерлы Казан – Зөя, 6365,6362 һәм 6364 номерлы Казан – Албаба – Казан юнәлешендәге шәһәр яны поездларының хәрәкәт графигында планлаштырыла. 6357, 6358 номерлы Казан – Канаш – Казан, 6366 номерлы Албаба – Казан, 6302, 6356 һәм 6004 номерлы Зөя – Казан, 6324 номерлы Паратск – Казан, 6434 номерлы Казан – Арча, 6440 һәм 6427 номерлы Казан – Сосновка – Казан поездларының җәдвәле биш минутка кадәр үзгәрәчәк.

Хәрәкәтнең яңа графигы поездлар арасындагы хәрәкәт интервалын киметүне күздә тота һәм килеп туган эпидемиологик вәзгыятькә бәйле аеруча актуаль булган барлык маршрутларда пассажирлар агымының тигез бүленешен тәэмин итә.

Шәһәр яны поездлары расписаниесе турында тулырак мәгълүматны +7(937)625-04-33 (тәүлек буе) телефоны буенча «Содружество» акционерлык җәмгыяте сайтында, кассаларда һәм тукталыш пунктларында урнаштырылган мәгълүмат стендларында алырга мөмкин.

Шәһәр яны поездларында пассажирларны куркынычсыз йөртүне тәэмин итү өчен барлык чаралар күрелә. Аерым алганда, барлык составлар да зарарсызландыручы юу чараларын кулланып, даими рәвештә мәҗбүри санитар эшкәртү уза. Пассажирларга битлек режимын сакларга кирәк, дип хәбәр иттеләр «Содружество» акционерлык җәмгыятендә.

Шулай ук укыгыз

Барлык яңалыклар