Яңа ел бәйрәмнәрендә Казанның стационарлары һәм бала тудыру йортлары тәүлек буе эшләячәк

3, 6 һәм 9 гыйнвар көннәрендә поликлиникаларның эше көчәйтелгән режимда оештырыла

Марат Мөгыйнов фотосы

Казанда Яңа ел һәм Раштуа бәйрәмнәре вакытында медицина учреждениеләре тулы әзерлек режимында эшләячәк. 31 декабрьдән 11 гыйнварга кадәр стационарлар һәм бала тудыру йортлары пациентларны тәүлек буе кабул итәчәк. Бу хакта аппарат киңәшмәсендә Сәламәтлек саклау идарәсе башлыгы Илназ Әхмәдиев хәбәр итте.

Поликлиникалар, стационарларның поликлиника бүлекләре (олылар һәм балалар челтәре), хатын-кызлар консультацияләре авыруларны 2025 елның 31 декабреннән 2026 елның 11 гыйнварына кадәр 09.00–17.00 вакыт аралыгында кабул итәчәк.

Бу көннәрдә шәһәр халкына дежур терапия һәм педиатрия бригадалары хезмәт күрсәтә.

2026 елның 3, 6, 9 гыйнвар көннәрендә поликлиникаларның эше көчәйтелгән режимда оештырылачак: дежур терапия һәм педиатрия бригадаларыннан тыш, лаборатория һәм рентгенология хезмәтләре, «тар профильле» белгечләр, травматология пунктлары көндезге режимда эшләячәк.

Поликлиникаларның эш режимы, шәһәрдәге эпидемия вәзгыятен исәпкә алып, үзгәртелергә мөмкин, дип билгеләп үтте шәһәрнең Сәламәтлек саклау идарәсе башлыгы Илназ Әхмәдиев.

Тәүлек буе эшли торган травматология пунктлары, яшәү урыны нинди булуына карамастан, беренчел мөрәҗәгать иткән пациентларны кабул итәчәк.

Яңа ел һәм Раштуа бәйрәмнәре вакытында түбәндәге бүлекләргә мөрәҗәгать итәргә мөмкин булачак:

– «12 нче номерлы шәһәр клиник хастаханәсе» дәүләт автоном сәламәтлек саклау учреждениесе – Лечебная урамы, 7, телефон: +7(843)223-05-89;
– «7 нче номерлы шәһәр клиник хастаханәсе» дәүләт автоном сәламәтлек саклау учреждениесе – Адоратский урамы, 30А, телефон: +7 (843)522-66-71;
– «7 нче номерлы шәһәр поликлиникасы» дәүләт автоном сәламәтлек саклау учреждениесе – Фатыйх Кәрим урамы, 14/67, телефон: +7(843)293-13-67;
– «18 нче номерлы үзәк шәһәр клиник хастаханәсе» дәүләт автоном сәламәтлек саклау учреждениесе – Хөсәен Мәүлетов урамы, 2, телефон: +7(843)223-02-00;
– «Татарстан Республикасы Сәламәтлек саклау министрлыгының Балалалар республика клиник хастаханәсе» дәүләт автоном сәламәтлек саклау учреждениесе – Хәйдәр Бигичев урамы, 20, телефон: +7 (843)221-94-03.

Стоматология поликлиникаларының эше (олылар һәм балалар челтәрләре) 2025 елның 31 декабреннән 2026 елның 11 гыйнварына кадәр кыскартылган график буенча: 09.00 сәгатьтән 15.00 сәгатькә кадәр оештырыла.

Олыларга һәм балаларга кичектергесез стоматология ярдәме «Шәһәр стоматологиясе» акционерлык җәмгыяте тарафыннан 17.00 сәгатьтән 06.00 сәгатькә кадәр Чернышевский урамы, 10/6 адресы буенча күрсәтеләчәк.

Яңа ел уңаеннан бәйрәм чаралары уздырыла торган урыннарда шәһәр халкына һәм башкала кунакларына кирәк булганда медицина ярдәме күрсәтү өчен медицина бригадалары кизү торачак.

Сүзен йомгаклап, Сәламәтлек саклау идарәсе башлыгы кискен респиратор вирус инфекциясе билгеләре: югары температура, катараль күренешләр күзәтелгән шәһәр халкыннан инфекцияләр таралуны кисәтү өчен массакүләм чараларга һәм җәмәгать урыннарына барудан тыелып калуларын үтенде.