«Казанга хатлар» күргәзмәсе, «Йолдызлы билет» премиясе һәм тамариск утырту: ТР башкаласында «Аксенов-фест» узачак

Төп чаралар В.Аксенов музей-йортында һәм ТР Милли китапханәсендә оештырыла.

Фото: Марат Мөгыйнов

(Казан шәһәре KZN.RU, 18 август). 19 нчы һәм 20 нче августта Казанда язучы Василий Аксеновның 90 еллыгына багышланган 15 нче «Аксенов-фест» узачак. Шәһәрдә лекцияләр, күргәзмәләр, «Йолдызлы билет» премиясен тапшыру, берничә мәйданчыкта иҗади очрашулар оештырыла.

19 нчы августта 10:30 сәгатьтә В.Аксенов музей-йортында фестиваль ике шәһәр – Казан һәм Коктебель арасында мәдәни күпер ачачак. 12:00 сәгатьтә «Казанга хатлар. Документлар. Фоторәсемнәр. Хатлар» күргәзмәсе эшли башлый.

Тагын бер фотографияләр күргәзмәсе ТР Милли китапханәсендә 13:15 сәгатьтә ачыла. Эшләрнең авторы – Татарстан Республикасының атказанган сәнгать эшлеклесе, Россия Рәссамнар берлеге әгъзасы Фәрит Гобәев, документлар Александр Солженицынның рус чит илләре йорты тарафыннан тәкъдим ителгән. Шулай ук китапханәгә килгән һәр кеше «Аксеновка хат яз» дип аталган гадәти булмаган акциядә катнаша ала. Төп конференц-зал янында язучының машинкасы белән өстәл куелачак, килүчеләр язучыга хат юллый һәм аның дуслары һәм фестивальдә катнашучы хезмәттәшләреннән фәлсәфи җавап ала алачак.

13:30 сәгатьтә ТР Милли китапханәсендә «Аксенов-фест киңәш итә. Язучы һәм аның якын даирәсе» күргәзмәсе кысаларында Василий Аксеновның гына түгел, ә аңа иҗади яктан якын булган авторларның әсәрләре тупланачак. 14:00 сәгатьтә Аксеновның юбилеена багышланган фильм күрсәтеләчәк, ә 15:00 сәгатьтә Евгений Попов үзенең яңа «Фазил» китабын тәкъдим итәчәк. 16:00 сәгатьтә килүчеләрне язучы, «Йолдызлы билет» премиясе лауреаты Денис Осокин, ә 17:00 сәгатьтә «Казан» журналының баш мөхәррире Альбина Әпсәләмова белән әдәби-музыкаль кичә көтә.

Казан Ратушасында 19:00 сәгатьтә «Йолдызлы билет» әдәби-музыкаль премиясен тапшыру башланачак. Кичәдә халык артисты Игорь Бутман чыгыш ясаячак.

Фестивальнең икенче көне, 20 нче август, Аксенов скверында 10:00 сәгатьтә язучының бөтен иҗаты өчен символик булган үсемлек – тамарискны утыртудан башлана.

ТР Милли китапханәсендә бу көнне 12:00 сәгатьтә «Әдәби газета»ның баш мөхәррирләре Максим Замшев, «Казан» журналының баш мөхәррире Альбина Әпсәләмова һәм «Октябрь» журналының баш мөхәррире Ирина Барметова белән иҗади очрашулар узачак. 15:00 сәгатьтә Александр Кабаков һәм Евгений Поповның «Аксенов» китабын уку булачак.

20 нче августта 18:30 сәгатьтә Казан яшь тамашачы театрында Аксенов әсәрләре мотивлары буенча куелган «Гена Стратофонтов маҗаралары» спектакле күрсәтеләчәк.

Фестивальне ябу тантанасы «Черек күл» паркында узачак. 19:00 сәгатьтә башланачак әдәби-музыкаль кичәдә Казан артистлары һәм фестиваль кунаклары язучы турындагы хатирәләре белән уртаклашачак. Чарада музыкаль коллективлар, прозаиклар, шагыйрьләр чыгыш ясаячак.

«Аксенов-фест» чараларының тулырак программасы белән сылтама буенча танышырга мөмкин.

Фестиваль чараларына билетлар буенча кереп була, аларны, түбәндәге сылтама буенча теркәлү узып, бушлай алырга мөмкин булган. Шулай ук +7(843)236-42-93 кайнар линия телефоны буенча теркәлергә була.

Шулай ук укыгыз

Барлык яңалыклар