Казан метросы хезмәткәрләре соңгы ике атнада 18,6 чакрым тоннель юганнар

Махсус агрегат белән 13,7 чакрым тоннель чистартылган, 3,2 мең квадрат метр дивар һәм уемнар кулдан юылган

Фото «Метроэлектротранс» муниципаль унитар предприятиесе матбугат хезмәтеннән алынды

Ике атна эчендә Казан метрополитенының юл хуҗалыгы хезмәтенең Тоннель корылмалары дистанциясе хезмәткәрләре 18,6 чакрым тоннель юганнар. «Авиатөзелеш» станциясеннән «Дубравная» станциясенә кадәрге участокта махсус агрегат белән икенче төп юлда 13,7 чакрым ара юылган.

«Дубравная», «Г.Тукай мәйданы», «Горки» һәм «Әмәт» станцияләрендә 3,2 мең квадрат метр дивар һәм уемнар кулдан юылган. Моннан тыш, хезмәткәрләр беренче төп юл буенча «Сукно бистәсе» – «Әмәт» өлешендә 550 метр араны һәм икенче төп юл буенча «Г.Тукай мәйданы» – «Сукно бистәсе» өлешендә 1,2 мең метр араны кулдан юганнар.

Бу вакыт эчендә метрополитенда шулай ук җайланмалар төзекләндерелгән һәм аларга хезмәт күрсәтелгән. Эшчеләр станцияләрдә 32 ишекне төзекләндергән. Шулай ук «Яшьлек» станциясендә 30 тактиль плитә һәм «Горки» станциясендә инвалидлар өчен каралган пандуслардагы 46 идән, стена плитәсе алыштырылган, дип хәбәр итә «Метроэлектротранс» муниципаль унитар предприятиесе.

Алдарак 2025 елда Казан метрополитенында йөрүче пассажирларның 2 меңнән артык әйбер онытып калдыруы турында хәбәр ителгән. Югалган әйберләрнең 85 проценты хуҗаларына кире кайтарылган.

Шулай ук укыгыз

Барлык яңалыклар