Казанда 146 җәйге веранда түләүсез урнаштырылды

2020 елда Казанның Кулланучылар базары комитеты тарафыннан эшкуарларның теләкләрен исәпкә алып, шәһәр территориясендә 268 урынга исәпләнгән сезонлы сәүдә объектларын урнаштыру схемасы расланган иде.

Алар ведомство үткәргән 16 аукционда уйнатылды. Сатуга барлыгы 122 лот чыгарылган, һәм нәтиҗәләр буенча 5,3 млн сумлык 81 килешү төзелгән, бу 2019 елның шул ук чоры күрсәткечләреннән 7,5%-ка югары.

Казанда сезонлы сәүдә объектларының 50%-тан артыгы – җәйге верандалар иде, быел аларның 146-сы эшләде. Быел коронавирус инфекциясе таралу сәбәпле җитди зыян күргән ресторан бизнесына ярдәм итү максатыннан, Казан башкарма комитеты аларны узган җәйге сезонда урнаштырганга түләү алмаска дигән карар кабул итте.

Казанда сезонлы сәүдәнең башка объектлары арасында 38 яшелчә һәм җиләк-җимеш сату ноктасы, туңдырма, баллы һәм салкын эчемлекләр белән 30 урын эшләде. Көтелгәнчә, эшкуарлар тарафыннан шәһәрнең үзәк урамнарында урнашкан сәүдә урыннарына ихтыяҗ югары булды.

2020 елда Казанның Кулланучылар базары комитеты законсыз урнаштырылган сезонлы стационар булмаган сәүдә объектларына каршы актив көрәш алып барды, алар аукционнардан урын сатып алучы эшкуарларга сәламәт булмаган көндәшлек барлыкка китерә. Ел башыннан Казанда 270 законсыз сәүдә объекты демонтажланган, шуларның 77-се ведомство саклау базасына күчерелгән. Законсыз сәүдә итүнең 3350 факты буенча 6 млн. сумнан артык күләмдә штраф салынган.

Ел дәвамында составына Кулланучылар базары комитеты, район администрацияләре, Архитектура һәм шәһәр төзелеше идарәсе, Җир һәм мөлкәт мөнәсәбәтләре комитеты кергән контроль-кабул итү комиссиясе тикшереп торды.

2020 елда төп кисәтүләр сәүдә өчен алынган мәйданның артык булуы, объектның проектка туры килмәве һәм төзекләндерү кагыйдәләрен бозу булды. Явыз ниятле хокук бозучылар белән килешүләр өзелде. Комиссия эше нәтиҗәсендә Кулланучылар базары комитеты 3 шартнамәне өзде, объектлар демонтажланды, тагын 18 объект таләпләргә туры китерелде.

Сезонлы шартнамәләрнең гамәлдә булу сроклары ноябрьдә бетә. Хәзер, шәһәр төзелешенең актив үсүенә бәйле рәвештә, район администрацияләре белән берлектә сезонлы сәүдә объектларын урнаштыру схемасына үзгәрешләр кертелә. Казанның Кулланучылар базары комитеты эшмәкәрләрне һәм халыкны урнаштыру схемасына яңа нокталарны кертү турында тәкъдимнәр белән мөрәҗәгать итәргә чакыра. Тәкъдимнәрне kazantorg@yandex.ru электрон почтасына яки Казан шәһәре, Жуковский урамы, 12 адресы буенча юлларга мөмкин.