Казан мәктәпләренә яңа уку елында 19 меңнән артык беренче сыйныф укучысы керәчәк

Казанда яңа уку елында мәктәп парталары артына 182,3 мең укучы утырачак, бу узган ел белән чагыштырганда 8 меңгә күбрәк. Шуларның 19 меңнән артыгы – беренче сыйныф укучылары. Иң күп беренче сыйныф укучыларын 184 нче гимназия кабул итәчәк, анда 405 баладан 12 беренче сыйныф тупланган. Рекордчылар арасында шулай ук 185 нче лицей да бар, анда 401 баладан 13 беренче сыйныф, 186 нчы лицей – 392 баладан 13 беренче сыйныф, 182 нче лицей һәм 107нче гимназия – 318 һәм 280 баладан 11 беренче сыйныф.

Белем көнендә Казанда «Яз» торак районында, М14 микрорайонында һәм Родина урамында урнашкан өч яңа мәктәп ачылачак. Аларда 4 меңгә якын укучы белем алачак.

Яңа уку елында 2 нче татар гимназиясе территориясендә заманча уку кабинетлары, ике спорт залы һәм актлар залы булган 270 урынлык аерым корпус эшли башлаячак. Мәктәп базасында методик остазлык үзәге оештырылачак, анда КФУ белгечләре һәм гимназия укытучылары эшләячәк. КФУ студентлары полилингваль мәктәпләрдә һәм татар телендә укытыла торган мәктәпләрдә эш тәҗрибәсе алу өчен ачык дәресләргә йөри алачак.

Быел алты мәктәптә һәм 17 азык-төлек блогында капиталь ремонт үткәрелгән, аларны мәктәп рестораннары итеп үзгәрткәннәр.

Гадәттәгечә, уку елы Белем көненә багышланган тантаналы линейкалардан башланачак. Беренче сыйныф укучылары Казан мэриясеннән бүләккә «Изге эшләр көндәлекләре» һәм яктылыкны кире кайтара торган элементлар алачак, ә икенче сыйныф укучыларына «Яшь эколог көндәлекләре» тапшырылачак.

3 сентябрьдә барлык мәктәпләрдә «Экстремизмга – юк! » дигән бердәм дәрес, шулай ук Бесландагы фаҗигане искә алу көненә багышланган класс сәгатьләре һәм әңгәмәләр узачак.

5 сентябрьдә «Юл хәрәкәте куркынычсызлыгы көне» узачак, аның кысаларында мәгариф оешмаларында укучыларда юлда куркынычсызлык кагыйдәләрен формалаштыру өчен чаралар оештырылачак.

5 сентябрьдән 12 сентябрьгә кадәр мәктәпләрдә «Игелек атнасы» һәм «Игелек дәресләре» оештырыла. Атна балалар йортларына, авыру һәм мохтаҗ балаларга, шулай ук йортсыз хайваннарга ярдәм йөзеннән хәйрия ярминкәләре белән тәмамланачак.