Казанда яңа уку елыннан мәктәп ашханәләрендә салат-барлар оештырыла

Казанда яңа уку елына 19 мәктәптә азык-төлек блогы реконструкцияләнгән. Шулай итеп, 1 нче сентябрьдән 169 ашханә мәктәп рестораннары форматында эшләячәк, бу аларның гомуми санының 90% ын тәшкил итә.

Капиталь ремонт барышында мәктәп ашханәләрендә электр белән тәэмин итү, су белән тәэмин итү, канализация һәм вентиляция системалары челтәрләре алыштырылган, шулай ук эчке отделка эшләре башкарылган.

Азык-төлек департаменты акчасына әлеге мәктәпләрдә җиһазлар алыштырылган, мебель яңартылган, декоратив элементлар һәм белем бирү плакатлары сатып алынган.

Җиһазларны алмаштыру һәм модернизацияләү ремонт бара торган урында гына түгел, ә кирәк булган барлык мәктәпләрдә уку елы дәвамында үткәрелә.

Уку елы башына барлык мәктәпләр өчен департамент кирәкле күләмдә савыт-саба, инвентарь, махсус кием сатып ала.

Реновация нәтиҗәсендә 19 ремонтланган ашханәдә 478 өстәмә утырту урыны булдырылган, ә дүрт яңа мәктәп ачылганнан соң урыннар саны тагын 2880 гә артачак. Соңгы биш елда ашханәләрне ремонтлау һәм яңа мәктәпләр ачу нәтиҗәсендә 11 меңнән артык өстәмә урын булдырылган.

Гомумән алганда, агымдагы елда мәктәп ашханәләрен реконструкцияләүгә 325 млн сум акча юнәлтелгән, шуларның 220 млн сумы – кече сыйныфларны бушлай кайнар ризык белән тәэмин итү буенча республика программасын гамәлгә ашыру кысаларында, 105 млн сумы – азык-төлек һәм социаль туклану департаментының үз акчаларыннан.

Моннан тыш, азык-төлек комбинатының җитештерү куәтләре модернизацияләнде. 50 кв.м мәйданлы сыр саклау өчен камера урнаштырылган һәм 30 кв.м мәйданлы сырны фасовкалау өчен участок төзелгән. Хәзерге вакытта кайнар цех мәйданын 1,5 тапкырдан артык арттыру буенча эшләр алып барыла – 437 кв. метрдан 750 кв. метрга кадәр. Әлеге чаралар ризык әзерләү һәм азык-төлек саклау процессын оештыруның нәтиҗәлелеген арттырырга мөмкинлек бирәчәк.

Укучыларның сәламәт һәм баланслы туклану төрлелеген тәэмин итүгә аерым игътибар бирелә. Моның өчен сентябрьдән барлык мәктәп ашханәләрендә салат-бар тәкъдим ителәчәк, ул балаларга, үз өстенлекләреннән чыгып, төрле ингредиентлардан һәм заправкалардан яшелчә салатлары ясарга мөмкинлек бирә.

Яңа уку елында мәктәпләрдә туклану сыйфаты буенча ата-аналар контроле дәвам итәчәк. Кирәк булганда, ата-аналар үз теләкләре белән кайнар линия телефоны (+7800-234-33-88) аша, otzyv@poelidovolen.ru электрон почтасы, телеграм-канал һәм «Туклану департаменты»ның «Вконтакте»дагы төркеме яки предприятиенең poelidovolen.ru рәсми сайты аша мөрәҗәгать итә алалар.

2023 елның сентябреннән Казанда туклану департаменты 170 меңнән артык Казан укучысын кайнар ризык белән тәэмин итәчәк, бу узган ел белән чагыштырганда 10 меңгә күбрәк. Шулардан 80 мең укучы бушлай тукланачак – бу башлангыч сыйныф укучылары һәм мобилизацияләнгән казанлыларның гаиләләреннән булган балалар.