23 февральдә бушлай «Крылья мужества Михаила Девятаева» күргәзмәсенә барырга мөмкин

Якшәмбе, 23 февральдә, заманча сәнгать галереясында шәһәр халкы «Крылья мужества Михаила Девятаева» күргәзмәсен бушлай карый ала. Чара мәңгелек дан һәм истәлеккә лаек булган очучы, Бөек Ватан сугышы герое Михаил Девятаевка, шулай ук аның гаиләсенә багышланган.

Күргәзмәгә килүчеләр Девятаевларның сирәк фотосурәтләрен, документларны, рәсем һәм скульптура әсәрләрен, гаиләнең шәхси әйберләрен күрә алачак, аларның күбесен беренче тапкыр тәкъдим итәчәкләр. Экспозициядә – илнең иң танылган һәм хөрмәтле гаиләләренең берсе тарихына чумарга мөмкинлек бирә торган 100 дән артык экспонат.

Экспозиция Михаил Девятаевның тормыш юлының төп этапларын: аның балачак һәм яшүсмер елларын, Бөек Ватан сугышы елларын, яулап алынган очкычта немец әсирлегеннән батырларча качуын һәм сугыштан соңгы тыныч чорны үз эченә ала. Күргәзмәдә төп игътибар очучының тормышындагы гаилә роленә бирелгән.

Күргәзмә берничә бүлеккә бүленгән: очучының батырлыгы, Девятаевларның традицияләре һәм кыйммәтләре, геройның һөнәри юлы, Михаил Девятаевның хатыны гаиләсе турында хикәя, Фәүзия һәм Михаил гаиләсенең тарихы белән танышу.

Күргәзмә кысаларында килүчеләргә шулай ук танылган очучының батырлыгы турында фильмнар күрсәтеләчәк, өлкәннәр һәм балалар өчен чаралар, гаилә әгъзалары белән очрашулар уздырылачак.

Килүчеләрне Карл Маркс ур., 57 адресы буенча көтәләр. Чарага керү ирекле, дип хәбәр иттеләр оештыручылар.